No mar nada se desperdicia, os seus habitantes son expertos en reempregar todos os recursos que este medio particular proporciona. Os esqueletos de ourizo ou os bulbos das laminarias son un bo lugar de onde tirar partido e, por suposto, as cunchas baleiras. Entre as cunchas das zonas de cascallo agóchanse os peixes, vermes, caranguexos ou moluscos, mais as cunchas abandonadas tamén son un bo lugar onde ocultar a posta de ovos. Nos arredores da baliza de Cabo de Mar atopamos unha parella de lorchiños dentro dunha das moitas cunchas de mexillón baleiras que alí se acumulan. Despois de botar unha ollada máis atenta, démonos conta de que a femia estaba a pegar os ovos dentro mentres o macho os fecundaba, ao tempo que gardaba a "entrada" do seu cativo niño de amor.
A dificultade de iluminar este pequeno espazo non nos permite amosar todo o esplendor do momento, pero deixámosvos unha pequena mostra dun feito tan normal e excepcional á vez. Primeiro obsérvase a femia facendo a posta, despois aparece o macho, coa súa vistosa aleta dorsal, para facer o resto.